साउन ३ गतेबाट मुलुकभर स्वास्थ्य सेवा ठप्प पार्ने चिकित्सक संघको चेतावनी

- रेडियो कान्तिपुर संवाददाता, काठमाडौं

    असार ३२, २०७५

    नेपाल चिकित्सक संघले साउन ३ गतेबाट देशभरका सबै अस्पतालको आकस्मिक बाहेकका सेवा ठप्प पार्ने चेतावनी दिएको छ । संघले आज विज्ञप्ति जारी गरी साउ तीन गते देखि देशभरका सम्पूूर्ण स्वास्थ्य संस्थाहरुमा आकस्मिक सेवा बाहेकका सम्पूर्ण स्वास्थ्य सेवा अनिश्चित कालका लागि बन्द गरिने जनाएको छ ।

    अनशनरत डा गोविन्द केसीको मागप्रति ऐक्यवद्धता जनाउँदै संघले सरकारलाई माग पूरा गर्न ४८ घण्टाको समय दिएको हो ।

    तोकिएको समयसीमा भित्र पनि माग पूरा नभए संघले आगामी बिहीबारबाट देशभरका सम्पूूर्ण सरकारी तथा निजी शिक्षण अस्पताल, नर्सिङहोम, क्लिनिक लगायतका सम्पूूर्ण स्वास्थ्य संस्थाहरुमा आकस्मिक सेवा बाहेकका सम्पूर्ण स्वास्थ्य सेवा अनिश्चित कालका लागि बन्द गरिने निर्णय भएको महासचिव लोचन कार्कीले जानकारी दिनुभयो । 

    संघद्वारा जारी विज्ञप्तिमा भनिएको छ, ‘प्रा. डा. गोविन्द केसीको जीवन रक्षाका लागि सरकार समक्ष पटक/पटक अपिल गर्दा समेत डा केसीको जीवनरक्षाका लागि कुनै चासो नदेखाएको, सरकारको तर्फबाट कुनै पनि जिम्मेवारी बोध नगरिएको परिस्थिति प्रति नेपाल चिकित्सक संघ गम्भिर चिन्ता व्यक्त गर्दै गर्दछ । चिकित्सक संघ डा. गोविन्द के.सी.को जीवन रक्षाका लागि आजैको मितिदेखि लागू हुने गरी ४८ घण्टा भित्र नेपाल सरकारलाई अविलम्ब वार्ता टोली बनाई डा. केसीको जीवन रक्षा गर्न जोडदार माग गर्दछ ।

    विज्ञिप्तमा भनिएको छ, ‘देशभरका सम्पूूर्ण स्वास्थ्य संस्थामा आकस्मिक सेवा बाहेकका सम्पूर्ण सेवा बन्द गर्ने परिस्थितिको सिर्जना सरकारले नै गराएकोले यसबाट सर्वसाधारणहरुमा पर्न जाने असुुविधा प्रति नेपाल चिकित्सक संघ गहिरो दुु:ख व्यक्त गर्दछ ।’

    प्रकाशित:असार ३२, २०७५

    User's Feedback

    Comment via Facebook

    फेसबूक छैन? यो फारम प्रयोग गर्नुहोस्