शिरिषलाई ओपन वाटर पौडीको उपाधि

- दीपक परियार, लेखनाथ

    आश्विन २६, २०७५

    ओलम्पियन शिरिष गुरुङले पोखरामा भएको आठौं ओपन वाटर पौडी प्रतियोगिताको उपाधि जितेका छन् । पोखराको फेवातालमा शुक्रबार भएको प्रतियोगितामा नेपाली सेनाका उनले निर्धारित २ दशमलव ५ किलोमिटर दूरी २१.३२.६७ मिनेटमा पार गर्दै पहिलो भएका हुन् । 

    यसअघि उनले प्रतियोगिताको पाँचौं र छैठौं संस्करणमा उपाधि जितेका थिए । सन् २०१५ मा १९ दशमलव ४० मिनेटमा दूरी पार गरेको रेकर्ड उनकै नाममा छ ।

    प्रतियोगितामा वेदज्ञराज जोशी दोस्रो भए । उनले २१.३८.११ मिनेटमा दूरी पार गरे । दीपंकर अवाले २१.४२.९२ मिनेटमा निर्धारित दूरी पार गरेर तेस्रो भए । उनीहरुले क्रमश: २५ हजार, १५ हजार र १० हजार रुपैयाँ प्राप्त गरे ।

    महिलातर्फ काठमाडौंकी उपास्ती महर्जन पहिलो भइन् । उनले २२.३३.३५ मिनेटमा दूरी पार गरिन् । समिराशोभा थापाले २३.५५.९५ मिनेटमा दूरी पार गरेर दोस्रो स्थान हासिल गरिन् । तेस्रो भएकी श्रेबी महर्जनले २४.०५.७७ मिनेटमा दूरी पार गरिन् । विजेताले क्रमश: १० हजार, ८ हजार र ५ हजार रुपैयाँ प्राप्त गरे । 

    पोखराका खेलाडीमध्येबाट धनमान गुरुङ पहिलो भए । उनले २६.४८.७४ मिनेटमा दूरी पूरा गरे । अर्जुन नेपालीले ३०.१८.१० मिनेटमा दूरी पार गरेर दोस्रो र ठाकुर चौधरीले ३३.५६ं.४९ मिनेटमा दूरी पार गरेर तेस्रो भए । उनीहरुले क्रमश: ८ हजार, ५ हजार र ३ हजार रुपैयाँ पाए । 

    प्रतियोगिले फेवातालको बाराहीघाट पौडी सुरु गरी तालपारी पुगेर पुन: बाराहीघाट फर्किएका थिए । प्रतियोगितामा ५ विदेशी सहित ४० खेलाडी सहभागी भए ।

    महिलातर्फ १० जनाले प्रतिस्पर्धा गरे । नेपाल पौडी संघको सहयोगमा कास्की जिल्ला पौडी संघ र जिल्ला खेलकुद विकास समितिले प्रतियोगिता गरेको हो । विजयी खेलाडीलाई प्रदेश सांसद राजीव पहारीले पुरस्कार वितरण गरे । 

    प्रकाशित:आश्विन २६, २०७५

    User's Feedback

    Comment via Facebook

    फेसबूक छैन? यो फारम प्रयोग गर्नुहोस्