विदेशमा नेपालीको शंकास्पद लगानीको छानविनमा सरकार उदासिन

- अनिल परियार , काठमाडौं
  • अन्तर्राष्ट्रिय जगतमा मुलुक कालोसूचीमा पर्ने सम्भावना बढेको विश्लेषक बताउँछन्
मुलुकमा धनी र गरीबबीचको खाडल असामान्य ढंगबाट बढिरहँदा विदेशी बैंकमा पैसा थुपार्ने नवधनाढ्यको मोह उदेक लाग्दो छ ।

माघ ९, २०७५

नेपालका नवधनाढ्यहरुले अवैध कमाइ विदेशमा राख्ने, ट्याक्स हेवेन मुलुकहरूमा कम्पनी खडा गरी भ्रष्टाचारदेखि विभिन्न अपराध सम्मबाट भएको कमाइलाई ‘सेतो धन’ बनाउने काम गरिरहेको खुलेको छ ।

साथै प्रत्यक्ष विदेशी लगानीको नाममा त्यहाँबाट अवैध रकम भित्राउने र कानूनले बर्जित गरेको विदेशमा लगानी पनि हुने गरेको पाइएको छ । हालै भएको यो खुलासाले हाम्रो राज्य संयन्त्र, सुशासनको अवस्था, मुलुकमा व्याप्त अराजकता, भ्रष्टाचार र बदनियत पनि छर्लङ भएको छ ।

विदेशमा रहेको लगानीको वैधता छानविनमा सरकारी बेवास्ता लम्बिदै जाने हो भने अन्तर्राष्ट्रिय जगतमा मुलुक कालो सूचीमा पर्ने सम्भावना बढेको विश्लेषकहरु बताउँछन् ।  

राज्यका माथिल्लो निकायमै पहुँच पुर्‍याएका नवधनाढ्यहरुको विदेशी बैंक खाताले मुलुकभित्रको अर्थतन्त्रमा पुन: एक पटक खतराको घण्टी बजेको छ । स्वीस बैंक लगायात ट्याक्स हेवन मानिएका बैंकहरुमा राखिएका अर्बौ रुपैयाँको वैधानिकतामा समेत प्रश्न सोझिएका छन् । नेपालीहरुलाई विदेशमा लगानी गर्न बर्जित छ ।

खोज पत्रकारिता केन्द्र खोपके र दी इन्टरनेशनल कन्र्सोर्टियम अफ इन्भेष्टिगेटिभ आईसीआईजेले गरेको अनुसन्धानका क्रममा ५२ अर्ब रुपैयाँ भन्दा बढी विदेशका विभिन्न बैंकमा नेपालीहरुको पैसा देखिएको छ । अवैधानिक तवरले मुलुकभित्र र बाहिर थुप्रिएका लगानी र पछिल्लो पटक सार्वजनिक विवरणले मुलुकको कालो अर्थतन्त्रमा खतराको घण्टी बजिसकेको खोपकेका सम्पादक शिव गाउँलेले बताउनुभयो ।

सम्पत्ति शुद्धिकरण विभाग नै आफू मातहत राखेका प्रधानमन्त्री केपी ओली यतिखेर विश्व आर्थिक मञ्चको बैठकका क्रममा स्वीट्जरल्याण्डमा हुनुहुन्छ र नेपालमा लगानीका लागि अन्तर्राष्ट्रिय समुदायलाई आग्रह गरिरहनुभएको छ ।

मुलुकमा लगानीका लािग विश्व समुदायलाई आग्रह गरिरहँदा अवैध लगानी सम्बन्धी 'नेपालीक्स' विवरणले सम्पत्ति शुद्धिकरण सम्बन्धी सरकारी बेवास्तालाई उदाङगो पारेको छ । राष्ट्र बैंकका डेपुटी गर्भनर चिन्तामणी शिवाकोटीले अवैध लगानी छाविनका लागि केन्द्रीय बैंकको प्रयास मात्र प्रर्याप्त नहुने बताउनुभयो ।    ।

कानूनले प्रतिबन्ध लगाउँदा लगाउँदै पनि नेपालीहरुले घुमाउरो बाटोबाट विदेशमा लगानी गरेका छन् । अझ रोचक चै के छ भने २०६४ सालमा सम्पत्ति शुद्धिकरण निवारण ऐन बनेपछि धेरै नेपालीले विदेशी बैंकमा रकम थुपारेका छन् ।

जुन रकमको वैधतामा अन्तर्राष्ट्रिय समुदायले समेत प्रश्न उठाउन सक्ने भन्दै सरकारले तत्काल छानविन शुरु गर्नुपर्ने बताउनुहुन्छ राष्ट्र बैंकका पूर्व गर्भनर दिपेन्द्र बहादुर क्षेत्री । 

मुलुकमा धनी र गरीबबीचको खाडल असामान्य ढंगबाट बढिरहँदा विदेशी बैंकमा पैसा थुपार्ने नवधनाढ्यको मोह उदेक लाग्दो छ । प्रधानमन्त्री बने लगत्तै सम्पत्ति शुद्धिकरण विभागलाई आफ्नो मातहत ल्याएका केपी ओलीको उद्देश्य र आम जनमानसमा उठेका प्रश्नको जवाफ पनि "नेपालीक्स" काण्डमा उहाँले खेल्ने भूमिकाले प्रश्ट्याउने छ ।

स्वीस वैंकमा रहेको भनिएको रकमको वैधानिकता खोज्न स्वीजरल्याण्डको आर्थिक सम्मेलनबाट प्रधानमन्त्रीले सक्छन की सक्दैनन् ? हेर्न बाँकी छ । 

प्रकाशित:माघ ९, २०७५

User's Feedback

Comment via Facebook

फेसबूक छैन? यो फारम प्रयोग गर्नुहोस्