निलम्बित एसपी दिल्लीराज अदालतमा उपस्थित

- भवानी भट्ट, कञ्चनपुर

    चैत्र ५, २०७५

    कञ्चनपुरकी १३ वर्षिया बालिकाको बलात्कार पछि हत्या भएको घटनामा प्रभावकारी छानविन नगरेको भन्दै बर्खास्तीमा परेका नेपाल प्रहरीका एसपी दिल्लीराज विष्ट आज अदालतमा हाजिर भएका छन् । अघिल्लो बुधबार जिल्ला अदालत कञ्चनपुरले उपस्थितीका लागि ३५ दिने सुचना जारी गरेको १४ दिनमा उनी आज अदालत उपस्थित भएका छन् ।

    अदालतले केहीबेरमा उनको बयान लिने तयारी गरेको छ । बयानपछि थुनछेक बहस सुरु हुनेछ । बर्खास्तमा परेका कञ्चनपुरका तत्कालीन एसपी विष्टसहित ८ प्रहरीविरुद्ध अनुसन्धानमा लापरवाही गरेको तथा निर्दोषलाई पक्राउ गरी यातना दिएको भन्दै जिल्ला अदालतमा मुद्दा दायर भएको थियो । आरोपित डीएसपी अंगुर जिसी भने अझै फरार छन् ।

    यसअघि पक्राउ परेका ६ जना प्रहरीलाई भने कञ्चनपुर अदालतले धरौटीमा छाड्न आदेश दिइसकेको छ । न्यायाधीश राजेन्द्रकुमार आचार्यको इजलासले तत्कालीन डिएसपी ज्ञानबहादुर सेठी, प्रहरी निरीक्षकद्वय एकेन्द्र खड्का र जगदीश प्रसाद भट्ट, प्रहरी सहायक निरीक्षक हरिसिंह धामी र रामसिंह धामी तथा जवान चाँदनी साउद रिहा भएका हुन् । निर्मलाको गत साउन ११ गते बलात्कारपछि हत्या भएको थियो ।

    घटनाको ८ महिनासम्म पनि प्रहरी अनुसन्धान अझै शुन्यमा छ । अनुसन्धानका लागि प्रहरीले आवश्यक ठोस प्रमाण समेत जुटाउन सकेको छैन ।  

     

    प्रकाशित:चैत्र ५, २०७५

    User's Feedback

    Comment via Facebook

    फेसबूक छैन? यो फारम प्रयोग गर्नुहोस्