शिक्षा तथा स्वास्थ्य उपसमितिको म्याद फेरि थपियो

- रेडियो कान्तिपुर, काठमाडौं

    असार ४, २०७६

    मेडिकल कलेजहरुको शुल्क विवाद लगायत विषयमा अध्ययन गर्न गठित संसदको शिक्षा तथा स्वास्थ्य समिति अन्तर्गतको उपसमितिको समायावधि दोस्रो पटक एक महिनाका लागि थप गरिएको छ । यस अघि गत बैशाख २६ गते समितिले जेठ २६ भित्र प्रतिवेदन बुझाउन एक महिनाका लागि समय थप गरेको थियो ।

    उपसमिति संयोजक सुरेश कुमार राईले मेडिकल कलेजको अध्ययन कार्य जारी रहेको हुँदा थप एक महिनाको समय आवश्यक रहेको बताउनुभयो ।

    चिकित्सा विज्ञानका स्नातक तह (एमबीबीएस र बीडीएस) सहित अन्य कार्यक्रमका निर्धारित शुल्क कार्यान्वयन सम्बन्धमा उपसमितिले हालसम्म सरकारी तथा निजी क्षेत्रका विभिन्न २० मेडिकल कलेजको स्थलगत अध्ययन पूरा गरिसकेको छ ।

    काठमाडौं विश्वविद्यालय स्कुल अफ मेडिकल साइन्स र बीपी कोइराला स्वास्थ्य विज्ञान प्रतिष्ठान धरानको अध्ययन गर्न बाँकी रहेको संयोजक राईले जानकारी दिनुभयो । गत चैत १२ गते उपसमिति गठन भएको थियो । 

    प्रकाशित:असार ४, २०७६

    User's Feedback

    Comment via Facebook

    फेसबूक छैन? यो फारम प्रयोग गर्नुहोस्